Aðvörun við hjáguðadýrkun útskýrð og til mergjar krufin

Fyrsta boðorðið: "Þú skalt ekki hafa aðra guði en mig" er (eins og reyndar öll hin boðorðin) ekki sett Guðs vegna heldur okkar vegna.

Hin dýpri merking boðorðs þessa er: "Ef þú setur eitthvað annað en mig (Guð) í fyrsta sæti í lífi þínu þá endar það fyrr eða seinna með gráti og gnístran tanna."

"Það stafar ekki af því að ég reiðist og refsi þeim sem hafa aðra guði en mig (þ.e. þeim sem setja eitthvað annað en mig í fremsta forgang), heldur er það vegna þess að mannshjartað er þeirrar náttúru að til lengdar er ekkert nógu djúpt og fagurt til að svala þrá þess nema ég, Guðdómurinn hið innra."

(Eins og Ágústínus kirkjufaðir reit: "Hjarta vort er friðlaust uns það hvílist í Guði").

Og fyrir þau sem halda að það að setja Allah í fyrsta sæti í lífinu þýði eilífa meinlætakennda afneitun á öllu nema Allah, þá er hollt að rifja upp hin djúpvitru orð Jesú Krists: "Leitið fyrst Guðsríkis og þess réttlætis, og þá mun allt þetta (þ.e. veraldleg gæði - innsk. höf.) veitast yður að auki."

Með öðrum orðum: við snúum baki við öllu nema Almættinu, aðeins til að öðlast allt það sem við snérum baki við!

Á enskri tungu yrði þessu lýst svona: "you can have your cake and eat it too; in fact, you can have all the cakes in the world! - provided only that you give the maker of the cakes top priority."