´Dægurtónlist´ - hundljótt orð!

Því miður eigum við Íslendingar ekkert almennilegt orð sem samsvarar enska orðinu ´popular music´. Það orð sem oftast heyrist um nefnt fyrirbæri á íslensku, ´dægurtónlist, ´ er bæði villandi, ljótt og niðrandi. Orðliðurinn ´dægur´ er að sjálfsögðu dregið með hljóðvarpi af orðinu ´dagur´ og þýðir ´dægurtónlist´ því bókstaflega ´tónlist sem endist aðeins í einn dag´.

Þetta er í mörgum tilfellum fáránleg nafngift. Mörg svokölluð ´dægurtónlist´ er alveg jafn sígild og hin svonefnda ´sígilda músík´. Sem dæmi nefni ég Bob Dylan, The Grateful Dead og bestu plötur Rolling Stones (sérstaklega þríleikinn undursamlega ´Let It Bleed´, ´Sticky Fingers´ og ´Exile on Main Street´) - og margt fleira mætti tiltaka.

Hér með auglýsi ég eftir almennilegu íslensku orði í stað hins forljóta og lítillækkandi orðs ´dægurtónlist´.  

Athugasemdir

[Þarfagreinir, 12.4.2008 kl. 19:30]

Tja, er ekki málið að 'pop music' er einmitt notað yfir þá tónlist sem er vinsæl hverju sinni, eða bara vinsældatónlist almennt? Samanber það sem Wikipedia hefur um hugtakið að segja:

Pop music is music charted by the number or sales, plays, etc., that the work receives. It is not a particular genre or style of music, simply that which is the most popular for the tracked period of time. 

[Swami Karunananda, 12.4.2008 kl. 19:54]

´Pop music´ þýðir samkvæmt minni málkennd ekki það sama og ´popular music´ ´Pop music´ þýðir, eins og þú segir, vinsældatónlist - en ´popular music´ er heitið sem engilsaxar nota yfir tónlist sem ekki fellur undir geirann ´classical music´ án þess þó að vera endilega ´pop music´. Mörg tónlist sem heyrir undir hugtakið ´popular music´ hefur aldrei notið sérstakrar hylli á sölulistum og öðrum slíkum vinsældamælikvörðum.

Annars er það býsna hégómlegt og fánýtt að vera að þjarka svona um einskæra orðanotkun, þegar í fréttunum glymur á hverjum degi að væringar séu uppi víða um heim sakir þess að fátæklingar eigi varla lengur fyrir mat til að seðja sig og sína . . .

[Swami Karunananda, 12.4.2008 kl. 20:17]

(Smá viðbót við ofangreinda athugasemd): Að ´popular music´ þýði ekki hið sama og ´pop music´ ræð ég m.a. af því að þjóðlagatónlist hvers konar er af engilsöxum felld undir fyrrnefnda heitið. Og varla dettur nokkrum í hug að kalla þjóðlagatónlist ´pop music´, og ekki væri skárra að fella hana undir íslenska hliðstæðu ´pop music´:´dægurtónlist´.

´Dægurtónlist´ er ágæt þýðing á ´pop music´. En fyrir ´popular music´ verðum við einfaldlega að finna betra orð.

En ég endurtek að mun brýnni mál séu fyrir okkur að sinna en þetta karp um eintóma orðanotkun!