Jarðtengist, í andsk . . . nafni!

Sá sem þessar línur ritar hefur átt við afar illskeyttan sinnissjúkdóm að stríða í meira en fimm ár.

Of langt mál væri að rekja hér nákvæmlega tilurð og eðli geðklofans (en svo nefnist sjúkdómurinn). Læt ég mér nægja að segja að þegar ég var sem veikastur taldi ég mig vera þriðju holdtekju Guðdómsins á Jörðu (hinir fyrri tveir voru meistari Búdda og meistari Kristur). Þessu fylgdi svæsin vænisýki, þar sem ég taldi - eðlilega! - að Myrkrahöfðinginn væri á höttunum eftir mér og ætlaði að beita öllum þeim illskubrögðum sem hann ætti upp í erminni til að hindra mig í að uppfylla Messíasarhlutskipti mitt.

Hvað tilurðina að sefakrankleikanum varðar þá tel ég ástæðuna vera umfram allt : of mögnuð andleg reynsla samfara of lítilli jarðtengingu. Ég hugleiddi eins og vitlaus maður og sökkti mér ofan í alls kyns ójarðnesk fræði. Og vissulega sá ég ljósið gegnum hugleiðsluna! - en því miður er ég hræddur um að birtan hafi verið of skær fyrir heila minn, og hafi hreinlega grillað hann. Líki ég þessu oft við ljósaperu : ef of sterkum straumi er hleypt á peruna, þá springur hún. Önnur líking sem ég gríp gjarnan til er sú að heilinn er eins og blaðra : ef blaðran er ekki kyrfilega tjóðruð við Jörðina þá svífur hún bara eitthvert út í buskann, fullkomlega á valdi duttlungum vindanna.

Því má segja að sá mikli bati sem ég hef vissulega öðlast síðastliðin fimm ár sé aðallega því að þakka að ég hafi smátt og smátt verið að koma niður til Jarðar á ný. Farinn er ég að lesa óandlegar bókmenntir (spennusögur og annað þess háttar), stunda göngur og sund, hafa samskipti við venjulegt og jarðbundið fólk (og, það sem er ennþá betra, fólk sem hefur engan áhuga á andlegum fræðum eða er jafnvel aktíft á móti þeim), virða fyrir mér undur náttúrunnar, faðma tré og klappa dýrum, horfa á veraldlegar bíómyndir, hlusta á rokk og aðra jarðræna og viskerala tónlist, og þannig mætti áfram telja.

Því get ég ekki brýnt nógsamlega fyrir öllum andlegum leitendum að tryggja það að þeir séu nógu rækilega jarðtengdir, áður en (eða a.m.k. samhliða því að) þeir taki að leggja stund á hugleiðslu eða andleg fræði. Að öðrum kosti, ef jarðbindinguna skortir, er hætt við því að afleiðingarnar verði herfilegar - eins og ég er sorglegt dæmi um!

Ég ætla að ljúka pistli mínum á eilitlu orðsifjaspjalli. Orðið ´heilagur´ þýðir í raun aðeins það sem merking þess gefur til kynna - þ.e. að vera ´heill´. Og hvað er að vera ´heill´? Jú, það er að leggja jafna rækt við allar hliðar verundar sinnar; sál jafnt sem líkama, Jörðu jafnt sem Himnanna, skynsemi jafnt sem innsæi, o.s.frv.

Því ítreka ég áeggjan mína til þeirra sem hafa hug á að leggja út á hina andlegu brautu : jarðtengist, jarðtengist, jarðtengist! Að öðrum kosti gæti leið ykkar legið beint inná klikkhúsið!

Athugasemdir

[Heiðar Ingi (IP-tala skráð) 11.7.2007 kl. 00:23]

Kæri bróðir,

Spennsögur af ýmsum sortum get ég látið þér í té eftir því sem þú óskar enda veistu að ég hef góðan aðgang að slíkum hirzlum. En öllu mikilvægari sálubót og í raun allra meina elexír er pönkið. Það hefur nú bjargað geðheilsu minni oftar en einu sinni. Pönkið er eins frumefni eða neðandalsmaður tónlistarflórunnar. Öll vötn renna til pönksins og af pönkinu skulum vér þekkja þá.

Mæli með að þú takir kúrsinn Pönk 101 eða pönk fyrir byrjendur. Þar muntu kynnast m.a. Ramones, Dead Kennedy's, Sex Pistols, Stiff little fingers ofl. Var að hlusta á Holiday in Cambodia, Kill the poor og fleiri perlur með Dead Kennedy's um daginn. Krafturinn er á við þrjár Kárahnjúkavirkjanir. Og reiðin í Keflvíkungum eftir ÍA leikinn um daginn verður eins og góðlátlegt hjal í ómálga barni við hliðina á Jello Biafra á góðum degi.

Kv.

Heiðar Ingi

[Þarfagreinir, 11.7.2007 kl. 18:32]

Já, menn eru misvel jarðtengdir, og sumir þurfa að hafa meira fyrir slíku en aðrir. Svo held ég að það skipti miklu máli að vera í samskiptum við fólk almennt; varpa hugmyndum sínum og hugarheimi til sem flestra og fá athugasemdir um hann til að 'stilla af'. Það er ekkert mál að skapa sér hugarheim og hugmyndir í einrúmi, en því meira sem einrúmið er, þeim mun hættara er við að maður rati af réttri braut.

Annars tek ég undir það að pönkið er eðaltónlist og hugmyndafræði;  nokkuð sem ég sjálfur mætti til að mynda kynna mér betur. 

[Sigurjón, 19.7.2007 kl. 22:13]

Heill og sæll... Það er gott að vita að þú ræður okkur heilt.