Rifrildi ellegar reynsla?

Hugurinn getur fært endalaus rök bæði með og á móti tilvist Guðs.

En hvers virði eru slíkar rökþrætur?

Að mínu viti eru þær einskis virði. Það eina sem gildir er bein persónuleg reynsla af þessu fyrirbrigði sem trúarbrögðin kalla ´Guð´ (og sum trúarbrögð reyndar eitthvað allt annað, svo sem ´uppljómun´ eða ´self-realization´).

(Og með beinni persónulegri reynslu er átt við beina og persónulega reynslu hverrar manneskju fyrir sig. Upplifun annars fólks af Guði kemur mér að engu gagni - nema að svo miklu leyti sem það getur hjálpað mér að öðlast það sama og það hefur öðlast).

Ef við fléttum trúarbrögðunum inn í vangaveltur þessar þá er það mitt mat að eina réttmæta hlutverk trúarbragðanna sé að leiða fólk á vit uppljómunar eða Guðskynjunar eða hvað sem menn kjósa að kalla það.

En þessu hlutverki sínu hafa trúarbrögðin brugðist svo sorglega oft. Það er allt of algengt að trúarbrögðin snúist um að hampa og vegsama það sem með raun réttri á aðeins að vera leiðir að takmarkinu, en gleyma takmarkinu sjálfu.

Þessu má líkja við bátsferð yfir fljót, þar sem fljótið táknar heiminn með öllum sínum sorgum og freistingum osfrv. en bakkinn hinum megin fljótsins táknar uppljómun (eða Guðskynjun, ef fólk kýs heldur það hugtak).

Skynsöm manneskja sest í bátinn, rær yfir fljótið og þegar að bakkanum hinum megin er komið fer hún úr bátnum og skilur hann eftir handa næsta manni.

Það sem trúarbrögðin hins vegar gera (amk. allt of oft) er að reisa himinháan stall, hefja bátinn upp á stallinn og tilbiðja svo bátinn - og heimta í þokkabót að öll heimsbyggðin tigni bátinn á sama hátt og þau sjálf!

Og hvað áhrærir rökþrefið um tilvist ellegar eitilvist Guðs (sem tæpt var á í byrjun þessara hugleiðinga) þá má einnig nota ofangreinda líkingu um bátinn og fljótið: að karpa um það hvort uppljómun / Guðskynjun sé möguleg er eins og að standa á árbakkanum og deila um hvort nokkuð sé hinum megin árinnar eða hvort áin sé í raun úthaf með engan bakka hinum megin - í stað þess að setjast undir árar og kanna málið af eigin reynd.