Andstæður eru samstæður

Allt þetta tal kristindómsins og flestra annarra meiriháttar trúarbragða um ´sigur´ ljóssins yfir myrkrinu og lífsins yfir dauðanum, auk endalausra líkinga þar sem sigur dags yfir nóttu og sumars yfir vetri táknar sigur hins guðlega yfir hinu óguðlega - allt er þetta tómt þrugl í mínum eyrum.

Það væri allt eins hægt að tala um sigur hins kvenlega yfir hinu karllega, eða austuráttar yfir vesturátt, eða hins hvíta yfir hinu svarta, eða hljóðsins yfir þögninni, eða hita yfir kulda (ellegar öfugt) - og ótal margt annað mætti tilgreina.

Aldrei verður of oft hamrað á þeirri staðreynd að öll svokölluð ´andstæðupör´ eru í raun samstæðir og jafngildir pólar eins og sama fyrirbærisins - og geta alls ekki án hvor annars verið.

Ljós án myrkurs eða myrkur án ljóss, líf án dauða eða dauði án lífs, hiti án kulda eða kuldi án hita, dagur án nætur eða nótt án dags, hið kvenlega án hins karllega eða hið karllega án hins kvenlega osfrv. osfrv. - allt er þetta óhugsandi með öllu.

Þessar línur skrifa ég vegna þess að ég álít það hættulega og heimskulega fanatík að ákveða sem svo að annar póllinn í einhverju andstæðuparinu sé ´góður´ en hinn ´illur´, og verja svo ómældum tíma í að efla hinn fyrrnefnda og berjast gegn hinum síðarnefnda (eins og trúarbrögðin sérstaklega hafa svo oft gert sig sek um og gera enn).